Esta última semana foi política e vivencialmente importante. Por un lado celebrouse o 37 Congreso do Partido Socialista, no que se aprobaron resolucións que pouco a pouco se poñerán en marcha coa acción do Goberno, na medida que sexan interpretadas e asumidas debidamente polo conxunto da sociedade, preparatorio do que se celebrará en Galicia, na cidade de Santiago, na última semana de xullo, e por outra a remodelación do Goberno Municipal, debido ao nomeamento como Presidente da Confederación Hidrográfica do Sil de Paco Liñares, membro do mesmo desde 1999, data no que iniciamos o primeiro mandato.

Foron, son, anos de un intenso traballo en común imposibles de esquecer, enriquecedores, froito dos que seguro que é o nomeamento. Alégrome por Paco e polo traballo que vai realizar, que será moito e bo, pero teño que dicir que sinto a súa marcha.

Non podemos quedarnos na reflexión e na contemplación sobre o feito, porque a vida Municipal continúa e por iso xa están feitas as propostas das persoas que van dar continuidade o Goberno Municipal. Por unha banda incorporarase Rosana Rielo, persoa que representa a esa xente nova, preparada e xa con una experiencia de catro anos no mesmo. Lino G. Dopeso incorpora aos labores de Medio Ambiente os da Zona Rural, do que é coñecedor e que están relacionados coa súa actual área e incorporase unha muller, tamén nova, tamén preparada, con experiencia e con moitas ganas de seguir facendo ben as cousas do urbanismo, como é María Novo Pena, que na actualidade era Xerente da Empresa Municipal do Solo(EVISLUSA) e que o vai seguir sendo dada a correlación que hai entre ámbolos dous traballos.

A Lei chamada de Grandes Cidades, aprobada no Parlamento español polo PP, PSOE e outros Partidos, e a que nos sumamos, por decisión unánime do Parlamento Galego e logo dos Plenos, todas as capitais de Galicia, permite que no Goberno Local haxa Delegacións, neste caso a de Urbanismo, que poden ser desempeñadas por persoas non electas.

É o mesmo, tratándose de Gobernos, que haxa na Xunta de Galicia Conselleiros/as que o sexan a pesar de que non son Deputados. Participan do Goberno Galego como neste caso María Novo, participa da Xunta de Goberno Local, sendo responsables politicamente do seu traballo fronte a quen os nomeo e, no caso que nos ocupa, ante o Pleno, expresión da vontade popular.

Creo que é darlle un maior impulso ao Goberno Municipal e aproveitar a persoas que poden desempeñar moi ben determinados traballos sen que por iso teñan que concorrer a unhas eleccións. O que xuzgarán os veciños no seu momento é o traballo de un equipo e non o traballo de unha área ou de unha persoa determinada. É unha novidade pero é unha posibilidade que se debe aproveitar.

Pasaron varios días sen que ollara o blog e sen que fixera o comentario semanal. Non foi outra a razón que a viaxe realizada a China e que por iso me tiven que poñer o día das cousas que hai polo Concello e traballar nese día da día. Ademais houbo que preparar o Pleno do luns, a reunión mensual mensual da executiva da FEGAMP e hoxe a visita Institucional da Mesa do Parlamento de Galicia. Unha vez que está concluíndo o día póñome a recuperar este contacto cos blogueros.

As visitas itinerantes da mesa do Parlamento parécenme moi interesantes xa que un xeito de acercar a Institución á xente. É certo que aí é onde traballan día a día os Parlamentarios de cada Partido Político, que dan conta os seus votantes a través dos medios de comunicación e por si mesmos do seu traballo. Pero non é menos certo que achegarse ao pobo é tamén un xeito de que recoñezamos ese traballo e, sobre todo, que comprendamos a forma como o realizan.

E, en democracia, é mediante a palabra. Temos que ser conscientes da importancia que ten que os debates, por moi fortes e acalorados que sexan, son sempre mediante a palabra. E a máxima expresión da racionalidade humana e por iso, os que empregan outros medios para expresar o seu credo político, sobre todo os que o fan de forma violenta, están deixando de ser persoas. E verdade que logo sempre se impón a suma dos votos, pero non é menos certo que a libre expresión, e a utilización racional dos argumentos, deixa unha “impronta” na sociedade, que logo pódese reflectir nas urnas.

O Parlamento na rúa. É unha bonita expresión pero ten que ser tamén unha intelixente acción. O Parlamento ten a súa solemnidade e a súa liturxia, pero achegalo aos cidadáns é tamén unha forma de recoñecer a soberanía popular e dicirlles que son eles, que somos nos, aos que se dirixe o traballo político que se fai neste caso no Parlamento Galego. Iso é o que podemos ver na Praza Maior na que unha serie de fotos nos destacan o que é "convivir convivencias".

A democracia representativa seguro que ten que ir perfeccionándose día a día, pero non é menos certo que é o sistema político que mellor serve aos distintos intereses da sociedade porque sempre é froito da libre e voluntaria decisión popular.